Në Cyrih, një shtetas 50-vjeçar serb është shpallur fajtor për dy raste abuzimi seksual ndaj dy të rinjve dhe është dënuar me 27 muaj burg, si edhe me dëbim shtatëvjeçar nga Zvicra. Lajmi u publikua nga raportimi i “Tages-Anzeiger”.
Sipas gjykatës, rasti i parë lidhej me një të ri rreth 20 vjeç, i cili sipas aktakuzës ishte manipuluar nga i pandehuri dhe ishte vendosur në një situatë ku nuk kishte mundësi t’i shmangej abuzimit.
Trupi gjykues vlerësoi dëshmitë dhe provat si të mjaftueshme për ta shpallur burrin fajtor. Pavarësisht pretendimeve të tij se marrëdhënia kishte qenë e pëlqyer dhe se provat materiale mund të interpretoheshin ndryshe, gjykata e rrëzoi versionin e tij, duke theksuar se sqarimet e ofruara nuk qëndronin. Rasti i dytë lidhej me një praktikant 15-vjeçar që punonte në kompaninë e të pandehurit. I mituri deklaroi se ishte ngacmuar seksualisht gjatë punës, dhe gjykata i cilësoi dëshmitë e tij si të besueshme. Edhe për këtë episod, i akuzuari e mohoi përgjegjësinë, por pretendimet e tij nuk u morën parasysh. /Pasqyrapress/
