Autoritetet e drejtësisë në Kosovë kanë bërë të ditur se është ngritur një aktakuzë për krime lufte që lidhen me ngjarjet e vitit 1999 në zonën e Malishevës, duke e rikthyer sërish vëmendjen te drejtësia për viktimat civile të luftës.
Sipas njoftimit zyrtar, aktakuza ka të bëjë me dyshime për përfshirje në veprime kundër popullatës civile, përfshirë vrasje, dëbime, shkatërrim prone dhe plaçkitje, në një periudhë kur banorët nuk ishin pjesë e luftimeve, shkruan lajmpress, transmeton Pasqyrapress.
I dyshuari ndodhet në paraburgim që nga arrestimi i tij dhe pritet të përballet me proces gjyqësor në Gjykatën Themelore në Prishtinë. Rasti konsiderohet pjesë e përpjekjeve të vazhdueshme të institucioneve të Kosovës për të trajtuar krimet e luftës, edhe pas më shumë se dy dekadash nga përfundimi i konfliktit. Gjatë luftës në Kosovë, sipas të dhënave të institucioneve dhe organizatave ndërkombëtare, mijëra civilë humbën jetën, ndërsa shumë të tjerë u zhdukën. Proceset gjyqësore synojnë të hedhin dritë mbi këto ngjarje dhe të sigurojnë përgjegjësi ligjore për krimet e kryera. /Pasqyrapress/
