Një proces gjyqësor i gjatë dhe i ndërlikuar ka përfunduar me një nga vendimet më të rënda që ka njohur drejtësia franceze në fushën e mjekësisë.
Një ish-anestezist është dënuar me burgim të përjetshëm, pasi gjykata konstatoi se ai kishte rrezikuar qëllimisht jetën e dhjetëra pacientëve gjatë viteve të punës së tij.
Sipas autoriteteve gjyqësore françeze, mjeku u shpall fajtor për ndërhyrje kriminale në qeset e infuzionit, duke përdorur substanca të rrezikshme që çuan në pasoja fatale për një numër pacientësh dhe komplikime të rënda për të tjerë. Ngjarjet kanë ndodhur në disa klinika private në Francën lindore, gjatë një periudhe që shtrihet për gati një dekadë.
Hetimet nisën pasi një paciente pësoi komplikime serioze gjatë një operacioni rutinë, çka ngriti dyshime te stafi mjekësor.
Analizat laboratorike zbuluan nivele jashtë çdo norme të substancave të rrezikshme, duke alarmuar autoritetet dhe çuar në hapjen e menjëhershme të procedimeve penale.
Prokuroria e cilësoi sjelljen e të akuzuarit si një shkelje ekstreme të etikës mjekësore dhe një kërcënim të drejtpërdrejtë për jetën e pacientëve, ndërsa gjykata theksoi se veprimet e tij kishin minuar besimin publik te sistemi shëndetësor.
Gjatë gjykimit, i pandehuri mohoi vazhdimisht përgjegjësinë, por provat e paraqitura u konsideruan bindëse. Sipas ligjit francez, ai duhet të vuajë të paktën 22 vite burg para se të ketë të drejtë të kërkojë lirim me kusht. Vendimi mund të ankimohet brenda afatit ligjor. /Pasqyrapress/
