Behgjet Pacolli ka reaguar me një mesazh të fortë publik, në një kohë kur emri i tij është përmendur në deklaratat e fundit lidhur me rastin e vrasjes së Liridonës. Reagimi i tij vjen pasi Granit Plava ka pretenduar se edhe Pacolli kishte dijeni për këtë rast. Pa përmendur drejtpërdrejt emra, Pacolli ka zgjedhur të japë një qëndrim të përgjithshëm, duke folur për zhgënjimet nga njerëzit që, sipas tij, kanë përfituar nga mbështetja e tij dhe më pas janë kthyer kundër tij.
Ai thekson se rreziku jo gjithmonë vjen nga ata që duken si kundërshtarë, por shpesh nga persona të afërt që, pasi marrin ndihmë, ndryshojnë qëndrim dhe veprojnë ndryshe. Në reagimin e tij, Pacolli nënvizon se askush nuk ka të drejtë të përdorë emrin e tij për justifikim apo për të mbuluar veprimet e veta, duke shtuar se është distancuar prej kohësh nga individë dhe situata që nuk e përfaqësojnë më. Ai e përmbyll mesazhin duke theksuar se heshtja e tij nuk është shenjë frike, por një zgjedhje për të mos rënë në të njëjtin nivel me ata që, sipas tij, e kthejnë mirësinë në kundërpërgjigje negative. /PASQYRAPRESS/
