Një ngjarje e rëndë në qarkullimin rrugor është shënuar mbrëmjen e kaluar në jug të Shqipërisë, ku një mjet i rëndë ka humbur kontrollin dhe është rrëzuar në mes të aksit Levan–Tepelenë, pranë zonës së Poçemit. Kamioni, i cili transportonte agrume, është përmbysur duke bllokuar përkohësisht rrugën dhe duke shkaktuar shqetësim për drejtuesit e tjerë të mjeteve. Menjëherë pas incidentit, në vendngjarje janë nisur shërbimet emergjente, ka shkruar rtsh.
Drejtuesi i mjetit ka pësuar dëmtime trupore dhe është dërguar për trajtim mjekësor në spital, ndërsa personi tjetër që ndodhej në kamion ka shpëtuar pa lëndime. Burime spitalore bëjnë të ditur se i lënduari ndodhet jashtë rrezikut për jetën.
Autoritetet përkatëse kanë ndërhyrë për të larguar mjetin nga rruga dhe për të rikthyer normalitetin në qarkullim, ndërkohë që vijojnë verifikimet për të sqaruar rrethanat që çuan në aksident. /pasqyrapress/
