Mijëra udhëtarë janë përballur me vonesa dhe anulime masive në aeroportet amerikane, pasi një valë e fuqishme moti dimëror ka ndërprerë normalitetin e trafikut ajror në disa nga zonat më të frekuentuara të vendit. Kushtet e vështira atmosferike kanë ndikuar drejtpërdrejt në funksionimin e fluturimeve, veçanërisht në verilindje të SHBA-së, ku autoritetet lokale kanë aktivizuar masa emergjente për shkak të reshjeve intensive të dëborës.
Sipas të dhënave të publikuara nga shërbimet e monitorimit të trafikut ajror, mbi 9 mijë fluturime janë anuluar ose janë shtyrë, duke prekur udhëtime të planifikuara prej ditësh për pushimet e fundvitit.
Sic shkruan Periskopi, aeroportet kryesore në zonën e Nju Jorkut kanë njoftuar publikun se situata mbetet e paqëndrueshme dhe se kushtet e motit mund të sjellin pengesa të reja edhe në orët në vijim. Autoritetet u kanë bërë thirrje qytetarëve të kontrollojnë vazhdimisht informacionet për fluturimet dhe të shmangin udhëtimet e panevojshme deri në përmirësimin e situatës. /pasqyrapress/
