Një ngjarje e rëndë ka ndodhur në Crowdy Bay të Australisë, ku një çift nga Zvicra u sulmua nga një peshkaqen gjatë notit të mëngjesit, ka shkruar gazeta zvicerane Blick.
Autoritetet lokale konfirmuan se vajza e re humbi jetën në vendngjarje, ndërsa partneri i saj u dërgua me urgjencë në spital dhe ndodhet në gjendje të qëndrueshme.
Mediat australiane raportojnë se çifti, i moshës rreth të njëzetave, kishte mbërritur vetëm një ditë më parë në një kamping afër zonës.
Sipas dëshmitarëve, deti ishte i cekët në atë moment dhe mendohet se pranë kishte pasur balena dhe tufa të mëdha peshqish, të cilat mund të kenë tërhequr peshkaqenin. Konsullata e Zvicrës në Sidnej është vënë në kontakt me autoritetet australiane dhe po ofron mbështetje për familjarët e viktimës. /Pasqyrapress/.
