Komisioni për vlerësimin e dëmeve nga fatkeqësitë natyrore mbajti një mbledhje urgjente për të shqyrtuar situatën pas reshjeve të shiut të 18 nëntorit 2025.
Komisioni ka theksuar se, edhe pse Drejtoria për Mbrojtje dhe Shpëtim në Komunën e Gjilanit ka punuar në mënyrë të vazhdueshme në pastrimin e shtretërve të lumenjve dhe përrenjve, zgjerimin e fytave të ngushtë ku ka qenë e mundur dhe intervenimet e ekipeve emergjente gjatë reshjeve, intensiteti i lartë i shiut ka bërë që lumenjtë të dalin nga shtrati dhe të shkaktojnë dëme në familje dhe biznese.
Komisioni vendosi njëzëri që të dalë menjëherë në terren, të regjistrojë rastet dhe të vlerësojë dëmet e shkaktuara.
Kryesuesi Ali Arifi tha se pronarët e ekonomive familjare dhe subjektet afariste që kanë pësuar dëme më 18 nëntor duhet të paraqesin kërkesë në Komisionin për vlerësimin e dëmeve, në Qendrën për Qytetarë të Komunës së Gjilanit. Afati i aplikimit është nga 24.11.2025 deri më 08.12.2025.
Dokumentet e nevojshme janë: kërkesa për Komisionin, fotografi të objekteve të dëmtuara, adresa e saktë, numri i telefonit dhe kopja e letërnjoftimit të aplikuesit. /PasqyraPress/.
