Në Prishtinë ka nisur pezullimi i plotë i transportit publik dhe privat, duke lënë pa shërbim mijëra qytetarë që përdorin çdo ditë autobusin. Shkaku lidhet me problemet buxhetore të Komunës së Prishtinës, e cila nuk ka kryer pagesat ndaj kompanive të transportit.
Kryetari Përparim Rama e cilësoi situatën shumë të rëndë, duke theksuar se buxheti i Prishtinës është bllokuar për arsye politike. Ai tha se është bërë kallëzim penal ndaj ministrit të Financave dhe se çështja është dërguar te udhëheqësit e shtetit dhe Gjykata Kushtetuese.
“Në historinë e shtetit të Kosovës, rrallëherë kemi parë të rrezikohen qytetarët deri në këtë shkallë. Për më shumë se një vit, kanë alokuar buxhetin që i duhet kryeqytetit, por buxheti i Prishtinës është bllokuar për çështje politike. Ne kemi dorëzuar kallëzim penal ndaj ministrit Murati për shkelje të ligjit; jemi drejtuar te kryeministri, te presidentja dhe te Gjykata Kushtetuese. Qytetarët e Prishtinës kanë mbetur pa paga”, u shpreh Rama gjatë konferencës për media.
Ndërmarrja “Trafiku Urban” njoftoi se punëtorët nuk janë paguar prej muajsh dhe mungesa e karburantit ka detyruar ndërprerjen e të gjitha linjave. Edhe kompanitë private kanë ndalur qarkullimin, pasi nuk janë kompensuar për gjashtë muaj. Si rezultat, që prej mëngjesit është vërejtur rritje e transportit joformal në qytet. /PasqyraPress/
