Reshjet e dendura të borës kanë kthyer Alpet austriake në një zonë me rrezik serioz, ku ortekët po shkaktojnë pasoja tragjike, ka raportuar BBC, transmetojnë mediat kosovare. Autoritetet konfirmojnë se disa skiatorë që ndodheshin jashtë pistave të sigurta kanë humbur jetën, ndërsa të tjerë janë plagosur rëndë. Ngjarjet më të rënda janë regjistruar në rajonin Pongau, pranë Salzburgut, ku shërbimet e shpëtimit malor janë angazhuar në operacione të vështira për shkak të kushteve ekstreme të motit.
Zyrtarët theksojnë se situata e borës mbetet e paqëndrueshme dhe rreziku nga ortekët është ende i lartë. Tragjedi të ngjashme janë raportuar edhe në zona të tjera alpine në Austri, Zvicër dhe Francë, duke ngritur alarmin për sigurinë e sportistëve dhe turistëve gjatë këtij sezoni dimëror. Autoritetet u bëjnë thirrje të gjithë dashamirëve të sporteve dimërore që të shmangin lëvizjet jashtë pistave të autorizuara dhe të respektojnë paralajmërimet zyrtare, pasi çdo neglizhencë mund të ketë pasoja fatale. /pasqyrapress/
