TikTokeri i njohur Shontana është bërë virale pas publikimit të një videoje ku tregoi se ishte përballur papritur me paralizë të fytyrës. Ai rrëfeu se gjithçka filloi pasi për disa ditë ishte ndjerë i lodhur dhe kishte pasur dhimbje pranë veshit, por nuk e kishte menduar se situata do të përkeqësohej.
Sipas tij, momenti që e alarmoi ishte kur, ndërsa po lante dhëmbët, vuri re se pështyma po i shkonte “anash” dhe fytyra i dukej e shtrembër. “Aty e kuptova që diçka nuk ishte në rregull dhe u frikësova shumë,” u shpreh ai në video.
Shontana tregoi se kishte kërkuar ndihmë mjekësore, por ishte zhgënjyer nga vizita e parë, pasi – sipas tij – nuk mori trajtimin e duhur. Kjo e shtyu të fliste hapur për përvojën e tij, që të ndërgjegjësojë ndjekësit për reagimin e shpejtë kur shfaqen simptoma të tilla.
Ai po vazhdon trajtimin dhe ka marrë shumë mbështetje nga publiku, ndërsa videot e tij janë shpërndarë gjerësisht.
