Sot bëhen dy vite nga ngjarja e rëndë ku humbi jetën Liridona Ademaj. Në këtë përvjetor të dhimbshëm, vëllai i saj, Leonard Ademaj, ka ndarë një mesazh prekës në rrjetet sociale, ku rikthen në vëmendje mungesën e motrës dhe kërkesën e pandalur për drejtësi.
Ai shprehet se dy vitet e fundit kanë qenë të vështira për familjen, pasi jeta e tyre ka ndryshuar përgjithmonë pas humbjes së Liridonës.
“Malli për ty shtohet çdo ditë… asgjë nuk është më e njëjtë,” shkruan Leonardi, duke treguar se familja ende nuk është pajtuar me realitetin e hidhur. Në mesazhin e tij, ai i drejtohet edhe autorëve të krimit, duke theksuar se familja do të vazhdojë të kërkojë drejtësi deri në fund.
“Do të luftojmë deri në frymën e fundit. Kriminelët duhet të marrin dënimin e merituar.” Postimi është shoqëruar me një fotografi të Liridonës, duke e bërë edhe më emocional këtë përvjetor. Familja Ademaj, bashkë me fëmijët e Liridonës, Diar dhe Dion, vazhdojnë ta mbajnë gjallë kujtimin e saj, në pritje që procesi ligjor të mbyllet me drejtësi e qartësi të plotë. /Pasqyrapress/.
