Qeveria e Spanjës ka paralajmëruar masa të reja për kufizimin e përdorimit të rrjeteve sociale nga fëmijët, duke synuar ndalimin e plotë të aksesit për personat nën moshën 16 vjeç. Kryeministri Pedro Sánchez ka theksuar se fëmijët po ekspozohen ndaj përmbajtjeve të rrezikshme në një hapësirë digjitale që, sipas tij, është jashtë kontrollit.
Sánchez ka deklaruar se rrjetet sociale janë shndërruar në një mjedis ku të miturit përballen me dezinformim, përmbajtje të papërshtatshme dhe manipulim, duke e përshkruar realitetin aktual si një lloj “Perëndimi të egër digjital”, ku mungojnë rregulla të qarta dhe mbrojtje efektive për fëmijët. Sipas planit të qeverisë, platformat do të detyrohen të zbatojnë sisteme të detyrueshme për verifikimin e moshës, me qëllim që të miturit të mos kenë mundësi të hapin llogari. Autoritetet spanjolle kanë bërë të ditur se kompanitë që nuk respektojnë këto rregulla mund të përballen me masa ndëshkuese.
Ky propozim ligjor vjen në një kohë kur edhe vende të tjera po shqyrtojnë kufizime të ngjashme. Qeveria spanjolle e sheh këtë hap si pjesë të një përpjekjeje më të gjerë evropiane për të forcuar mbrojtjen e fëmijëve në hapësirën digjitale dhe për t’u vendosur kufij më të qartë gjigantëve të teknologjisë. /pasqyrapress/
