Dhuna ndaj protestuesve në Zvërnec ka shkaktuar reagime të forta në opinionin publik, ndërsa shumë pikëpyetje vazhdojnë të mbeten pa përgjigje. Pamjet e shpërndara nga protesta tregojnë persona të maskuar që përplasen fizikisht me qytetarët që kundërshtonin punimet në zonë. Sipas informacioneve të raportuara deri tani, një pjesë e personave të përfshirë në incident janë identifikuar si punonjës të sigurisë private të angazhuar për ruajtjen e kantierit. Autoritetet kanë njoftuar për arrestimin e një roje sigurie dhe nisjen e hetimeve për persona të tjerë të dyshuar për ushtrim dhune ndaj protestuesve.
Megjithatë, ende nuk ka një sqarim zyrtar se kush dha urdhrin për ndërhyrjen e tyre dhe kush mban përgjegjësinë për ngjarjet që u regjistruan gjatë protestës. Ndërsa hetimet vazhdojnë, qytetarë dhe organizata të shoqërisë civile po kërkojnë transparencë të plotë dhe zbardhjen e përgjegjësive për dhunën e ushtruar në Zvërnec. /pasqyrapres/
